اسعد السبعلي-عطر من لبنان

اشتقنا ع شمة عطر من لبنان
وغفوه ع فرشي منجدا نيسان….
ولوزة بعبا يتكتك العصفور
جناح النسيم بقلبها نعسان…

وصخور بيضا معرقا بزنبق
الفجر لبسها لوان لوان..
وراعي غنم ع صدرها معنق
غنى… وبصوتو تونسوا الوديان…

وبخور مريم تحت هاك الشير
بالندي غسل وجو, وفرحان!
ونسمات, عم تبوسو بكير
ململم ع حالو مقفقف وبردان

والورد… احلى ما نظم نوار
والطف هديه شافها البستان,
تشكلت منو بنات زغار
مطرح ما بدو يخلق الرمان…

One comment on “اسعد السبعلي-عطر من لبنان

Leave a Comment